Қазақстан Республикасы
Оқу-ағарту министрінің
2022 жылғы 16 қыркүйектегі
№ 399 бұйрығына
41-қосымша
Негізгі орта білім беру деңгейінің 5-9-сыныптарына арналған
«Ұйғыр тілі» оқу пәні бойынша үлгілік оқу бағдарламасы
(оқыту ұйғыр тілінде)
1-тарау. Жалпы ережелер
1. Оқу бағдарламасы «Мектепке дейінгі тәрбие мен оқытудың, бастауыш, негізгі орта, жалпы орта, техникалық және кәсіптік, орта білімнен кейінгі білім берудің мемлекеттік жалпыға міндетті стандарттарын бекіту туралы» Қазақстан Республикасы Оқу-ағарту министрінің 2022 жылғы 3 тамыздағы № 348 бұйрығымен бекітілген Мектепке дейінгі тәрбие мен оқытудың, бастауыш, негізгі орта, жалпы орта, техникалық және кәсіптік, орта білімнен кейінгі білім берудің мемлекеттік жалпыға міндетті стандарттарына сәйкес әзірленген (Нормативтік құқықтық актілерді мемлекеттік тіркеу тізілімінде № 29031 болып тіркелген).
2. «Ұйғыр тілі» оқу пәнін оқытудың мақсаты білім алушылардың тілдік дағдыларын дамыту, ана тіліне құрметпен қарайтын ұрпақты тәрбиелеу, тілдің әлеуметтік маңызын түсіне алатын, еркін қарым-қатынас пен сауатты жазуға дайын тіл нормаларын сақтай алатын тұлғаны қалыптастыру болып табылады.
3. «Ұйғыр тілі» оқу пәнінің басты міндеттері:
1) ұйғыр тілін ана тілі ретінде меңгеру негізінде сөйлеу әрекетінің барлық түрлері бойынша коммуникативтік дағдыларды қалыптастыру жолымен тілдік тұлғаны дамыту;
2) ұйғыр тілін күнделікті қарым-қатынас құралы ретінде пайдалану және тілдік құбылыстардың заңдылықтарын зерттеу дағдыларын қалыптастыру;
3) ұйғыр тілінің пайда болуын зерттеу.
4. «Ұйғыр тілі» оқу пәнінің бағдарламасы білім алушының тіл сауаттылығы мен сөйлеу сауаттылығын, сөз байлығын, басқалармен еркін қарым-қатынасқа түсу қабілетін дамытуды және оқушының ойлау қабілетін жетілдіруді көздейді.
