2020-2025 жылдарға арналған «Құндылықтарға негізделген білім беру» жобасын бекіту туралы
Қазақстан Республикасы Білім және ғылым министрінің міндетін атқарушының 2020 жылғы 12 маусымдағы № 248 бұйрығы
ҚР Білім және ғылым министрінің 2020 жылғы 4 қыркүйектегі № 384 бұйрығымен күші жойылды
Қазақстан Республикасы Үкіметінің 2019 жылғы 27 желтоқсандағы № 988 қаулысымен бекітілген Қазақстан Республикасында білім беруді және ғылымды дамытудың 2020 - 2025 жылдарға арналған мемлекеттік бағдарламасын іске асыру шеңберінде мектепке дейінгі, орта, қосымша, техникалық және кәсіптік, жоғары және жоғары оқу орнынан кейінгі білім беру ұйымдарында «Құндылықтарға негізделген білім беру» жобасын іске асыру арқылы білім беру ұйымдарының және ата-аналардың өзара іс-қимылының жаңа форматын енгізу мақсатында БҰЙЫРАМЫН:
1. Осы бұйрыққа қосымшаға сәйкес «Құндылықтарға негізделген білім беру» жобасы бекітілсін.
2. Осы бұйрықтың орындалуын бақылау жетекшілік ететін вице-министрлерге жүктелсін.
3. Осы бұйрық қол қойылған күнінен бастап күшіне енеді.
| Министрдің міндетін атқарушы | Ш. Каринова |
Қазақстан Республикасы
Білім және ғылым министрінің
міндетін атқарушының
2020 жылғы 12 маусымдағы
№ 248 бұйрығымен бекітілген
«Құндылықтарға негізделген білім беру» жобасы
«Құндылықтарға негізделген білім беру» жобасы (бұдан әрі - Жоба) пәндер мен қосымша білім беруді, тәрбие мен білім беру процестерін біріктіретін бірыңғай мәдени, білім беру және рухани-адамгершілік кеңістікті білім берудің барлық деңгейінде қалыптастыруды көздейді.
«Құндылықтарға негізделген білім беру» жобасы білім алушылардың рухани-адамгершілік дамуын қамтамасыз етуге, олардың бойында жалпыадами құндылықтарды тәрбиелеуге, академиялық үлгерімді арттыруға, әлеуметтендіруге, кәсіби бағдарлауға, сыни ойлауды дамытуға, экологиялық мәдениетті, салауатты және қауіпсіз өмір салтының мәдениетін қалыптастыруға бағытталған.
