Теңіз кемелерін куәландыру қағидаларын бекіту туралы
Қазақстан Республикасы Индустрия және инфрақұрылымдық даму министрінің м.а. 2023 жылғы 24 сәуірдегі № 277 бұйрығы
(2025.01.08. берілген өзгерістермен)
«Сауда мақсатында теңізде жүзу туралы» Қазақстан Республикасы Заңының 4-бабы 3-тармағының 55-44) тармақшасына сәйкес БҰЙЫРАМЫН:
1. Қоса беріліп отырған Теңіз кемелерін куәландыру қағидалары бекітілсін.
2. Қазақстан Республикасы Индустрия және инфрақұрылымдық даму министрлігінің Көлік комитеті заңнамада белгіленген тәртіппен:
1) осы бұйрықты Қазақстан Республикасының Әділет министрлігінде мемлекеттік тіркеуді;
2) осы бұйрықты Қазақстан Республикасы Индустрия және инфрақұрылымдық даму министрлігінің интернет-ресурсында орналастыруды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Индустрия және инфрақұрылымдық даму вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
| Қазақстан Республикасы Индустрия және инфрақұрылымдық даму министрінің міндетін атқарушы | А. Бейспеков |
Қазақстан Республикасы
Индустрия және
инфрақұрылымдық даму
министрінің міндетін атқарушы
2023 жылғы 24 сәуірдегі
№ 277 бұйрығымен бекітілген
Теңіз кемелерін куәландыру
қағидалары
1-тарау. Жалпы ережелер
1. Осы Теңіз кемелерін куәландыру қағидалары (бұдан әрі - Қағидалар) «Сауда мақсатында теңізде жүзу туралы» Қазақстан Республикасы Заңының 4-бабы 3-тармағының 55-44) тармақшасына (бұдан әрі - Заң) сәйкес әзірленді және теңіз кемелерін куәландыру тәртібін анықтайды.
2. Осы Қағидаларда мынадай ұғымдар қолданылады:
1) ақаулық - механизмдер мен жабдықтардың тұрақты жұмысының бұзылуы, атап айтқанда: жұмыс істемей қалуы (істен шығуы), реттеудің бұзылуы, қозғалтқыштардың, мойынтіректердің және жабдықтың қалыпты жұмыс істемеуі (діріл, шу, жоғары температура), аспап көрсеткіштерінің дұрыс көрсетпеуі;
