(БҰРЫНҒЫ РЕДАКЦИЯ) ҚР 16.07.99 Ж. № 427-I ЗАҢЫ

Қазақстан Республикасының патент заңы
1999 ж. 16 шілдедегі № 427-I Қазақстан Республикасының Заңы

(2014.29.09. берілген өзгерістер мен толықтырулармен)

Осы редакция 2015 жылғы 7 сәуірде енгізілген өзгерістеріне дейін қолданылды

Түпнұсқада мазмұны жоқ

1-тарау. Жалпы ережелер

2007.02.03. № 237-III ҚР Заңымен 1-бап жаңа редакцияда (бұр. ред. қара)

1-бап. Осы Заңда пайдаланылатын негізгі ұғымдар

Осы Заңда мынадай негізгі ұғымдар пайдаланылады:

1) айрықша құқық - өнеркәсіптік меншік объектісін өз қалауы бойынша кез келген әдіспен пайдалануға патент иеленушінің мүліктік құқығы;

2) бюллетень - өнеркәсіптік меншік объектілерін қорғау мәселелері жөніндегі ресми мерзімдік басылым;

2012.10.07. № 34-V ҚР Заңымен 2-1) тармақшамен толықтырылды

2-1) еуразиялық өтінім - 1994 жылғы 9 қыркүйектегі Еуразиялық патент конвенциясына сәйкес берілген өтінім;

3) зияткерлік меншік объектілері - зияткерлік қызмет нәтижелері және азаматтық айналымға қатысушыларды, тауарларды, жұмыстарды және қызмет көрсетулерді дараландыру құралдары;

4) қорғау құжаттары - осы Заңға сәйкес берілген өнертабыстарға инновациялық патенттер мен патенттер, өнеркәсіптік үлгілер мен пайдалы модельдерге патенттер;

5) қызметтік өнертабыс - қызметкердің өз қызметтік міндеттерін немесе жұмыс берушінің нақты тапсырмасын орындау кезінде жасаған өнеркәсіптік меншік объектілері;