«Астықтың сандық-сапалық есебін жүргізу қағидаларын бекіту туралы» Қазақстан Республикасы Үкіметінің 2011 жылғы 30 желтоқсандағы № 1676 Қаулысы (2013.08.08. берілген өзгерістер мен толықтырулармен) (күші жойылды)

Астықтың сандық-сапалық есебін жүргізу қағидаларын бекіту туралы
Қазақстан Республикасы Үкіметінің 2011 жылғы 30 желтоқсандағы № 1676 Қаулысы

(2013.08.08. берілген өзгерістер мен толықтырулармен)

ҚР Үкіметінің 2015 жылғы 31 қазандағы № 870 Қаулысымен күші жойылды

«Астық туралы» Қазақстан Республикасының 2001 жылғы 19 қаңтардағы Заңының 5-бабы 13) тармақшасына сәйкес Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған Астықтың сандық-сапалық есебін жүргізу қағидалары бекітілсін.

2. Осы қаулы алғаш ресми жарияланғанынан кейін күнтізбелік он күн өткен соң қолданысқа енгізіледі.

Қазақстан Республикасы

Үкіметінің

2011 жылғы 30 желтоқсандағы

№ 1676 қаулысымен

бекітілген

Астықтың сандық-сапалық есебін жүргізу

қағидалары

ҚР Үкіметінің 2013.08.08. № 811 Қаулысымен кіріспе жаңа редакцияда (бұр.ред.қара)

Осы Астықтың сандық-сапалық есебін жүргізу қағидалары (бұдан әрі - Қағидалар) «Астық туралы» 2001 жылғы 19 қаңтардағы Қазақстан Республикасының Заңына сәйкес әзірленді және астықтың сандық-сапалық есебін жүргізу тәртібін, оның ішінде астық қабылдау кәсіпорындарында астықты қабылдау, өлшеу, тазалау, кептіру, сақтау және тиеп жөнелту жөніндегі операцияларды ресімдеу және есепке алу, астық сақтау қоймаларында сақтаудағы астықтың мөлшерін айқындау тәртібін айқындайды.

1. Жалпы ережелер

1. Осы Қағидаларда пайдаланылатын негізгі ұғымдар:

1) астық иесі - астығын астық қабылдау кәсіпорнына сақтауға берген жеке немесе заңды тұлға;

2) астық партиясы - астық сапасы туралы мәліметтері бар құжаттармен ресімделген, бір жылғы егіннің сапасы бойынша біртекті оқшауланған астық мөлшері;