«Мемлекеттік және жалпы сыртқы борышты басқару жөніндегі тұжырымдама туралы» Қазақстан Республикасы Президентінің 2006 жылғы 29 желтоқсандағы № 234 Жарлығы (күші жойылды)

Қазақстан Республикасы Президентінің
Жарлығы
 
Мемлекеттік және жалпы сыртқы борышты басқару
жөніндегі тұжырымдама туралы

ҚР Президентінің 2014 жылғы 24 қарашадағы № 966 Жарлығымен күші жойылды

ҚАУЛЫ ЕТЕМІН:

1. Қоса беріліп отырған Мемлекеттік және жалпы сыртқы борышты басқару жөніндегі тұжырымдама мақұлдансын.

2. Осы Жарлық қол қойылған күнінен бастап қолданысқа енгізіледі.

Мемлекеттік және жалпы сыртқы борышты басқару жөніндегі тұжырымдаманы іске асыру жөніндегі іс-шаралар жоспарын қара

Астана, Ақорда, 2006 жылғы желтоқсанның 29-ы.

№ 234

Қазақстан Республикасы

Президентінің

2006 жылғы 29 желтоқсандағы

№ 234 Жарлығымен

МАҚҰЛДАНҒАН

Мемлекеттік және жалпы сыртқы борышты басқару жөніндегi

ТҰЖЫРЫМДАМА

1.  Кіріспе

2.  Тұжырымдаманың мақсаты мен міндеттерi

3.  Қазіргі жай-күйді талдау

4.  Тұжырымдаманың мақсатына қол жеткізу және міндеттерін орындау жөніндегі шаралар

5.  Қорытынды

ҚОСЫМША

1. Кіріспе

Елдің дүниежүзілік экономикаға белсенді кірігуі, елдің егемен кредиттік рейтингінің жақсаруы, шетел инвестицияларының үлкен көлемін тарту, сондай-ақ Қазақстан Республикасы Үкіметінің (бұдан әрі - Yкімет) және Қазақстан Республикасы Ұлттық Банкінің (бұдан әрі - Ұлттық Банк) валюта режимін ырықтандыру жөніндегі жоспарлары Қазақстан Республикасының орнықты дамуында сөзсіз шешуші рөл атқарады.

Соған қарамастан, экономиканың ашықтық дәрежесін арттыруға бағытталған қадамдар, сондай-ақ толыққанды ішкі қаржы нарығын қалыптастыру қажеттілігі Қазақстан Республикасы Үкіметінің, Ұлттық Банкінің және Қазақстан Республикасының қаржы нарығын және қаржы ұйымдарын реттеу мен қадағалау жөніндегі уәкілетті органының республиканың экономикалық қауіпсіздігінің тиісті деңгейін қамтамасыз ету жөнінде, сондай-ақ борыш құралдарының ішкі нарығын дамыту үшін жағдайлар жасау жөнінде бірқатар шаралар қабылдауына алып келеді.