Cу қорғау аймақтары, белдеулері, олардың шаруашылық пайдаланудың режимі мен ерекше жағдайлары туралы
Оңтүстiк Қазақстан облысы әкiмдiгiнiң 2017 жылғы 24 шілдедегі № 200 Қаулысы
(2018.19.06. берілген өзгерістермен)
Осы редакция 2022 жылғы 10 қарашада енгізілген өзгерістеріне дейін қолданылды
Қазақстан Республикасының 2003 жылғы 9 шілдедегі Су кодексінің 39 бабына, 116 бабының 2 тармағына, «Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасының 2001 жылғы 23 қаңтардағы Заңына, Нормативтік құқықтық актілерді мемлекеттік тіркеу тізілімінде № 11838 болып тіркелген Қазақстан Республикасы Ауыл шаруашылығы министрінің 2015 жылғы 18 мамырдағы «Су қорғау аймақтары мен белдеулерiн белгiлеу қағидаларын бекiту туралы» № 19-1/446 бұйрығына сәйкес Оңтүстік Қазақстан облысының әкімдігі ҚАУЛЫ ЕТЕДІ:
1. Белгіленсін:
1) осы қаулыға 1-қосымшаға сәйкес Оңтүстік Қазақстан облысының су нысандары мен су шаруашылығы құрылымдарының су қорғау аймақтары мен белдеулері;
2) осы қаулыға 2-қосымшаға сәйкес Оңтүстік Қазақстан облысының су нысандары мен су шаруашылығы құрылымдарының су қорғау аймақтары мен белдеулерінің шаруашылық пайдаланудың режимі мен ерекше жағдайлары.
2. Облыстың қала, аудан әкімдері заңнамада белгіленген тәртіпте:
1) тиісті облыстық маңызы бар қалалардың, аудандардың аумағында орналасқан су нысандары мен су шаруашылығы құрылымдарының су қорғау аймақтары мен белдеулерi шекараларын, олардың шаруашылық пайдаланудың режимі мен ерекше жағдайларының сақталуын;
2) жер үсті суларының ластануын, қоқыстануы мен сарқылуын болдырмау, сондай-ақ жануарлар мен өсімдіктер дүниесін сақтау үшін осы қаулының 1-қосымшасында көрсетілген су нысандары мен су шаруашылығы құрылымдарын санитарлық-гигиеналық және экологиялық талаптарға сай келетін күйде ұстауды қамтамасыз етсін.
3. Облыстың қала, аудан әкімдері заңнамада белгіленген тәртіппен су қорғау белгiлерiнің сақталуын қамтамасыз ету жөнінде шаралар қолдансын.
