Еуразиялық экономикалық одақ пен үшінші тараптың (үшінші тараптардың) кедендік транзитінің бірыңғай жүйесі туралы келісім (Санкт-Петербург қ. 2024 ж. 26 желтоқсанда) (қолданысқа енген жоқ)

Еуразиялық экономикалық одақ пен үшінші тараптың (үшінші тараптардың)

кедендік транзитінің бірыңғай жүйесі туралы

 КЕЛІСІМ

(Санкт-Петербург қ. 2024 ж. 26 желтоқсанда)

ҚР 2026 жылғы 10 маусымдағы № 303-VIII Заңымен ратификацияланды

Бұдан әрі мүше мемлекеттер деп аталатын Еуразиялық экономикалық одаққа мүше мемлекеттер

2014 жылғы 29 мамырдағы Еуразиялық экономикалық одақ туралы шартқа, 2017 жылғы 11 сәуірдегі Еуразиялық экономикалық одақтың Кеден кодексі туралы шартқа және 2018 жылғы 14 мамырдағы Еуразиялық экономикалық одақтың үшінші мемлекеттермен, халықаралық ұйымдармен немесе халықаралық интеграциялық бірлестіктермен халықаралық шарттары туралы келісімді негізге ала отырып,

сыртқы экономикалық байланыстарды кеңейтудің және оның тиімділігін арттырудың маңыздылығын мойындай отырып,

халықаралық сауда рәсімдерін оңайлатуға, Еуразиялық экономикалық одақтың (бұдан әрі - Одақ) кедендік шекарасы және үшінші тараптардың кедендік шекаралары арқылы тауарларды тасымалдауды жүзеге асыру үшін қолайлы жағдайларды қамтамасыз етуге және трансшекаралық жеткізілімдердің қауіпсіздігін қамтамасыз ету деңгейін арттыруға ұмтыла отырып,

тауарлар транзитінің еркіндігін дамытуды қалай отырып,

төмендегілер туралы келісті:

1-бап

1. Осы Келісім Одақтың кедендік аумағы мен үшінші тараптың (үшінші тараптардың) кедендік аумағы арқылы тауарларды тасымалдау (тасу) кезінде Одақтың және үшінші тараптың (үшінші тараптардың) кедендік транзитінің бірыңғай жүйесін қалыптастыру негіздерін айқындайды.

2. Одақтың және үшінші тараптың (үшінші тараптардың) кедендік транзитінің бірыңғай жүйесінің қалыптасуы мен жұмыс істеуі Одақ үшінші тараппен (үшінші тараптармен) жасасатын және осы халықаралық шартқа қатысушылардың осы Келісімнің 2-бабына сәйкес Одақтың кедендік аумағы мен үшінші тараптың (үшінші тараптардың) кедендік аумағы арқылы тауарларды тасымалдау (тасу) кезінде оңайлатуды қолдануын болжайтын халықаралық шартқа сәйкес жүзеге асырылады.