Қазақстан Республикасы
Үкіметінің
2007 жылғы 28 желтонсандағы
№ 1310 қаулысымен
бекітілген
Білім туралы мемлекеттік үлгідегі құжаттарды беру
ережесі
1. Білімнің және (немесе) біліктіліктің тиісті деңгейі туралы мемлекеттік үлгідегі білім туралы құжат (бұдан әрі - құжат) «Білім туралы» Қазақстан Республикасының 2007 жылғы 27 шілдедегі Заңының 39-бабына сәйкес білім беру ұйымында қорытынды аттестаттаудан өткен, лицензиясы бар, мемлекеттік аттестаттаудан өткен және негізгі орта, жалпы орта, техникалық және кәсіптік, орта білімнен кейінгі, жоғары, жоғары оқу орнынан кейінгі білім берудің білім беретін оқу бағдарламаларын іске асыратын азаматтарға беріледі.
2. Білім беру ұйымы оқып жатқан, қорытынды аттестаттаудан өткен:
1) жалпы білім беретін негізгі орта білімнің оқу бағдарламасын меңгерген білім алушыға куәлік береді;
2) түзету білім беру ұйымдарын бітірген зияткерлік дамуында кемістігі бар адамдарға куәлік береді;
3) Жалпы орта білім берудің жалпы білім беретін оқу бағдарламасын меңгергендерге аттестат береді;
4) тікелей өндірісте, оқу-өндірістік комбинаттарда, оқу орталықтарында және басқа да заңды тұлғалардың оқу-өндірістік құрылымдарында кәсіптік оқу бағдарламасын меңгергендерге куәлік береді;
5) техникалық және кәсіптік білім, орта білімнен кейінгі оқу бағдарламасын меңгергендерге диплом береді;
6) интернатура, резидентура және клиникалық ординатура кәсіптік оқу бағдарламасын меңгергендерге куәлік береді;
7) жоғары және жоғары оқу орнынан кейінгі кәсіптік оқу бағдарламасын меңгергендерге диплом береді.
«Доцент» немесе «профессор» ғылыми атағы берілген адамдарға аттестат беріледі.
ҚР Үкіметінің 2013.12.02. № 123 Қаулысымен 3-тармақ өзгертілді (бұр.ред.қара)
3. Негізгі орта немесе жалпы орта, техникалық және кәсіптік, орта білімнен кейінгі, жоғары білім беретін білім беру ұйымдарында білім алғандарға құжатты беру үшін тиісті комиссиясының шешімі негіздеме болып табылады.
Философия докторы (PhD), бейіні бойынша доктор дипломын беру үшін философия докторы (PhD), бейіні бойынша доктор ғылыми дәрежесін беру жөніндегі білім және ғылым саласындағы уәкілетті органның бұйрығы негіздеме болып табылады.
Қауымдастырылған профессор (доцент) немесе профессор аттестатын беру үшін қауымдастырылған профессор (доцент) немесе профессор ғылыми атағын беру жөніндегі білім және ғылым саласындағы уәкілетті органның бұйрығы негіздеме болып табылады.
Білім беру ұйымы басшысының шешімі түзету білім беру ұйымында, интернатурада және резидентурада білім алғандарға құжат беру үшін негіздеме болып табылады.
Білім алушылар қорытынды аттестаттау нәтижелерін және облыстардың, Алматы және Астана қалалары білім департаменттерінің ұсынған актілерін ескеретін Қазақстан Республикасының білім беру саласындағы уәкілетті органының шешімі негізінде»«Алтын белгі» белгісімен марапатталады.
4. Білім беру ұйымдарында білім алушыға орта негізгі білім туралы үздік куәлік, жалпы орта білім туралы үздік аттестат, үздік диплом куәлікке, аттестатқа, дипломға қосымшаға енгізілетін бағалардың негізінде беріледі.
ҚР Үкіметінің 2011.17.05. № 527 Қаулысымен 5-тармақ өзгертілді (бұр.ред.қара)
5. Білім алушыға құжатты тиісті шешім қабылданған күннен бастап он бес жұмыс күнінен кешіктірмей ол оқуын аяқтаған білім беру ұйымы салтанатты жағдайда, жеке өзіне береді. Құжатты жеке өзі алу мүмкіндігі болмаған жағдайда ол басқа адамға белгіленген тәртіппен ресімделген сенімхат бойынша беріледі.
ҚР Үкіметінің 2009.26.05. № 777 Қаулысымен 6-тармақ өзгертілді (бұр.ред.қара); ҚР Үкіметінің 2014.23.05. № 538 Қаулысымен 6-тармақ жаңа редакцияда (бұр.ред.қара)
6. Құжаттардың телнұсқалары және оларға қосымшалар жоғалған құжаттардың орнына беріледі.
Құжаттың телнұсқасын беру үшін мыналар негіздеме болып табылады:
1) құжатты жоғалтқан азаматтың немесе кәмелет жасқа толмаған баланың ата-анасының (заңды өкілінің) білім беру ұйымы басшысының атына оның жоғалуының мән-жайы баяндалған еркін түрде жазған өтініші;
2) құжаттың нөмірі және берілгенін тіркеу күні көрсетілген, азамат құжатының жоғалғаны жөніндегі ақпаратты орналастырған күнінен бастап жарияланған мерзімі 10 күннен аспаған мерзімді баспасөз басылымынан үзінді;
3) туу туралы куәліктің (2008 жылға дейін туылған жағдайда) немесе жеке куәліктің (паспорттың) көшірмесі.
Құжаттың телнұсқасы өтініш түскен күнінен бастап күнтізбелік 30 күннен кешіктірмей беріледі.
Құжаттың телнұсқасы құжаттың түпнұсқасы берілген тегіне, атына, әкесінің атына беріледі.
Құжаттардың телнұсқалары телнұсқа беру туралы шешім қабылданған сәтте қолданыста болған үлгідегі бланкілерде беріледі және оларға білім беру ұйымының басшысы және оның оқу жұмысы жөніндегі орынбасары қол қояды.
Берілетін құжаттың бланкісінде жоғары оң жақ бұрышында «Түпнұсқаның орнына берілген № телнұсқа» деген мөртаңба қойылады.
7. Өзінің тегін (атын, әкесінің атын) өзгерткен азаматтар өздерінде бар құжаттарды жаңа тегі (аты, әкесінің аты) жазылған құжатқа айырбастай алады. Айырбастау білім беру ұйымы басшысының немесе оны алмастыратын адамның шешімі бойынша тегін (атын, әкесінің атын) өзгерткенін растайтын құжаттармен бірге өзінің тегін (атын, әкесінің атын) өзгерткен азаматтың өтініші негізінде жүргізіледі.
Білім беру ұйымы басшысының немесе оны алмастыратын адамның шешімі, азаматтың өтініші мен тегін (атын, әкесінің атын) өзгерткенін растайтын құжаттар бітірушінің жеке ісінде сақталады. Бұрынғы тегі (аты, әкесінің аты) жазылған құжаттарды білім беру ұйымы алып қояды және белгіленген тәртіппен жояды.
8. Берілген құжаттардың, оның ішінде телнұсқалардың көшірмелері білім беру ұйымының мұрағатында бітірушінің жеке ісінде белгіленген тәртіппен бір данада сақталуы тиіс.